Cinderela Kedayan

Hi para pembaca.

Sorry batah betapa, ani bahawu tah belaku beceta. Nda ulah, sibuk tia ganya hunaa.

Kali ani, cetanya klasik sdikit, anu jaman p.ramlee..ah..bukan ia tu..ke dalam lagi sdikit, nuhun ah naagii uwang putih(anu dalam tv atu, wang putih pulang, nada ku tahu bangsa lain ah.)

Cetanya sal cinderela. Skip sdikit cetanya, kali ani tym pari-parinya datang(bila tani di brunei, pari atu lauk, anglah wang! nyaman hantap tu bila besalai, becacah kicap padas, iatah yang…sorry telebih sudaa).

Tym atu pari pari nya datang, kononnya kan menyelamatkan si cinderela lah ni ah.

“Hai cinderela, jan tah tetangis-tangis, aku ada kan menyelamatkan kau..” uja pari-pari atu.

Cinderela yang emosi ani, inda paduli, menangis ia lagi, di tukupnya lagi muha jan kain buuk.

“Dui lai buah hati, sudah sudah, cua ko padahkan ah ku, apa kin yang ko tangiskan ani?” tanya pari-pari atu.

Tataaap jua cinderela ani, makin basaa lagi tangisnya, siuuk-siuuk ganya bunyi hinguu nya.

“Aduhh dang! Betanya jua ku ni! Cua jawap dih, bila kan menangis tia ganya hunaa, muleh ku ni, off shift ku ni bila ko inda bepadah..” uja pari-pari atu maah sdikit. Sapa jua inda maah bila di tanya nda bejawap.

“Ehh.. soo.soory pari pari.. sadih ku hantap.. soory hantap.. jan muleh eh..” uja cinderela, damit ganya buat suaranya atu.

“Skali ko lagi ah..” bisik pari-pari atu dalam hati, tapi muha.. sanyum pulang. “Napa kin ko menangis ani? Hilang ucing mu?” tanya pari-pari atu.

“inda.. malam ani wah.. ada party di istana, aku ani kan ke sana.. kan escape tah ku ni.. kali mama tiri ku ani awal dah ia planning ani wah, di kuncinya pintu ah.. inda jua blaku kluaa tu.. kan kluaa ah tabuk.. punggung ani luan lebar.. ani jua.. bajuku wah.. WAAAAAA~~~~~!!!” uja cinderela taus ke tangis.

“Apa kin? Napa kin baju mu? Alum betaikah?” tanya pari-pari.

“Wa…ukan alum betaikah, andang ready made sudah, tinggal makai ja lagi, tapi bis indung tiri ku ani, di guntingnya baju ku atu, anu skirt labuh-labuh, jadi skirt sumpak, abis betanggalan manik-manikan ku ah, pas tu di caiknya lagi tu ah dada atu.. mbaie hawaaa jua tu.. mun dada luah-luah!” tangis si cinderela lagi taus mengunjukkan baju atu ah pari-pari.

“Adui.. ani kah yang caik ani ah? Atu banaa… bemara bila makai ni~” sambil membilak-bilak baju atu. “Cani nah.. jan tah menangis lagi.. aku ngusai baju mu ani.. tutup mata mu..” uja pari-pari atu lagi.

Skali, kluaa tiaa banaa magic pari-pari ani, magic yoo! Fuyoo! Skali sudahnya siap.. lawaa tia banaa baju atu.. yang labuh atu.. makin labuh lagi yo.. maniknya.. ukan semacam ganya..
“Buka matamu dang.. cua ko lihat.. “ uja pari-pari.

“WAHHH!! WAHHH!! WAHHH!! WAAH~~~ lawaaaaaa~ cantik~ waaah!! WAHH! Makasih pari-pari~makasih~~!” uja cinderela iski to da max.

“Hah.. sama~” uja pari-pari. “Tunggu.. memandangkan kau ani mbari kasian.. aku mbagi kau transport mu.. kiaa package lah ni.. haga hunjaa labu.. kumpulkan binatang-binatang peliharaan mu atu..tikus kah.. apakah..” uja pari-pari atu lagi.

“Aduh.. cana kin tu pari-pari? Kan menggulai labu besapak tikus kita kah?” cinderela tetanya-tanya.

“Eh.. ambil saja.. jan luan banyak tanya..lakas..”uja pari-pari balik.

Kali begagas tia banaa cinderela ani, mehunja a labu jan tikus. Kali, alum batah atu, betanya ya ah pari-pari atu.

“Anu..langsat dapatkah?”

“Eh.. labu bah labu!” uja pari-pari maah. Majal.. tamil ganya majal ani..

Kali, beluih tia banaa labu cinderela ani, jan tikus-tikusnya. Kejumpahan ya ucing, ambil di taiknya ucing atu, angkutnya jua. Di hunjuknya ah pari-pari. Labu atu kana ampaikan ke tanah, jan kucing sama tikusnya atu.

Mbuat magic ia lagi, Fuyoo! Nah.. Labu atu di tukaanya jadi mentuka labu..inda pulang beenjin..betayaa ganya..tikus atu jadi kuda, kucing atu jadi pemandunya.. masing-masing beupakan kucing jan tikus..

“Wushoooo! Canggih yo! Waaah!!” iski cinderela. Tanpa membuang masa.. naik tia banaa cinderela ani ke mentuka labu atu.. tapi sebelum ia jalan, pari-pari mnukaa slipaa cinderela atu..jadi glass slipper.. wah.. glamour gitu..

“Jan ko ahee muleh ah.. kul 10 abis tia hilang ni magic ku ani.. kang bebaju sumpak ko kang.. jantah betanya kenapa..tuuti saja..”warning pari-pari ah cinderela sebelum ia jalan.

Cinderela pun angguk-angguk ganya, menuutkan paintah..

Skali di skipkan ke ceta partnya hilang glass slipper.. tym putera raja atu bekaaiih mehunja ampunya glass slipper atu.. payah.. hujung pisuk tampat dah di haganya.. lubang samut ganya inda ia menguiik.. mana jua payah.. basaa hantap saiz batis cinderela atu.. awu.. baik jua lawa cinderela ani.. mun inda.. hah..

Kali.. tejumpa tia tampat umah cinderela putera raja ani, di lagaunya abis segala dangan dalam umah atu.. cinderela kana kunci lagi.. baik jua pintaa binatang peliharaannya ani.. mun kaang ani.. hah..

Tym awal-awal kaka tiri nya mencuba, tekajut penolong putera raja ani.

“Alaa! Bebuat samak ko dang ah batis mu ani.. baik jua nda ko bekabun..”uja penolong atu. Artinya, labat tu bulu batis kaka tiri nya yang tuha atu.

Laie hawaa kakanya tiri yang tuha atu.. datang pulang adi tirinya.. ia ani singit sdikit utaknya ni..kali ani.. kidum-kidum penolong putera raja atu.

“Awu dang.. ko ani.. ukan banaa ampunya slipaa ani aa.. memasang kiri kanan pun ko hayung..” uja penolong atu. Inda ulah, mana inda ia kidum-kidum, anu slipaa balah kiri di pasangnya ke kanan.. yang subalah kanan di pasangnya ke kiri.. damit lagi batisnya ani.. lasut-lasut wah batisnya ah.. ke dapan dapat..ke blakang pun dapat.. basaa tu artinya slipaa atu..

Laie hawaa adinya tiri atu.. datang tia cinderela. Mbawa batisnya yang basaa atu.. duduk tia banaa mencuba.. tediam penolong atu.. putera raja atu apa lagi.. beliak matanya.. kan ketelinga sanyumannya atu..

“Weh.. beser betisnye..” bisik penolong raja atu.

Di pindikkan ceta, kawin tia cinderela sama putera raja atu. bahagia tia besia. Mama sama adi tirinya abis kana hukum, kana jadikan amah, pari-pari atu bahagia, sal ia.. antah ah.. sal ia bahagia lah.. halnya tu..

Moral of the story, jan luan jahat ani, inda baik bila jahat2 ganya ani. Mbuat kunci spare awal-awal, simpan ah diri kunci atu. Batis atu jan luan di duluu bebulu bini-bininya.. mbali pencukur.. berakal-berakal tah sdikit.. anu jua.. bila batis kamu basaa.. hehe.. jan maah ah.. batis ku basaa jua.. seri tah tani tu..

·Cerita ini tidak ada kena mengena dengan yang hidup ataupun mati. Rekaan ganya tu yo~!

Selamat membaca,
Dari dan hak milik,
Uwangkedayan©2008.